Texte: dIsaïe LAMPIN Laisser le diaporama défile seul

Texte: d’Isaïe LAMPIN Laisser le diaporama défile seul

L’heure qu’al a tant r’doutée, al le vot arriver

Es’n infant i dort cor, al s’in va l’réveiller.

I l’est pas core chinq heures, déhors i fait cor nuit.

Ein’ à ein’ tous ches lampes s’alleument autour dé ch’puits,

Avant d’ouvrir el porte al intind ein’ tiote voix

Ech gamin i-a compris,es maman al est là.

L’matinée là, sur’mint i s’in rapp’lra tout l’temps,

I l’est hiaut comme tros peimmes, i n’a pas cor quinze ans,

Sin p’tit nez i-est pinché, ses yux i sont rougis

Nan ch’pétit i-a pas brait, mais i l’a mal dormi

I l’a vu tout passer, tout a tourné din s’tête.

Cha a tourné sùr’mint pu vite que les molettes.

Es maman al est là tout alintour ed li

Pour l’première fos dé s’vie, i va quitter sin nid

I sait à peinne voler, il li faudrot quéqu’un

Sin papa n’est pu là pour li l’printe par la main

Al l’imbrasse cor ein’ fos,al le serre su sin cœur,

Min tiot faut partir,té vos i va ête l’heure.

Ches mineurs i s’in vont,i vont t’accompagner

Avec eusses n’ai pas peur,i n’y ont tertous passé.

Mais ch’quémin qu’i dot faire i li paraît si long

I l’a tant ravaudé pour li juer au ballon

Qu’i qu’minche à découvrir des coins qu’i n’a pas vus.

Ech’chevalet là-bas, i l’est au fond dé l’rue.

Es’tiote barette su s’tête, es musette à sin dos

Avant d’rintrer dins l’cache,i soupire ein grand cop.

Ses pétites mains sont moites, sin pétit cœur i bat

Dins ein pétit momint i sera tout in bas.

Alors comme ein’ éclair tout s’jeunesse al arpasse

I s’arvot su ches bancs quand i l’étot in classe.

I r’pinse à sin papa,sin pépé,sin papi

Pour faire ech’ dur labeur, i n’y-ont laiché leu vie

Avec deux gros yux ronds,comme ein p’tit cat poursui

I tersaute à chaque cop qu’cha buque autour ed li.

I baisse bin s’pitite tête, i va buter ses pieds,

I li faudra longtemps pour apprinte ch’métier.

Et cha va ête comme cha pindant l’pu dure journée.

Quand briquet i viendra,cha n’voudra pas passer,

Sin bout’lot, ses tartines i res’tront dins s’musette

Pour sin tiot frère in hiaut,cha s’ra ch’pain d’alouette.

A mitan arlavé, avec deux grosses leunettes

I traverse ch’coron, comme ein’ poute d’escampette.

Jamais autant dé s’vie,i’a aimé es maman.

Al est là qu’al attind,d’pu ch’matin in trimblant.

I queur én’ dernière fos,il li saute à sin cou.

Alors deux gross’é larmes i queurtent su leurs joues

Et pi tout frémichant, s’blottichant su sin cœur

I li dit calmemint, maman j’ai pas eu peur.